一、初来报到
「Hi!你好啊，今日我第一日返工，我叫Summer。」呢间公司望落都唔算好大，不过装修好新净，周围都坐满晒同事。
我喺上一间公司做咗两年几，休息咗一个月终于都返新工。
「你好啊！我係你同事，我叫Chris。」眼前呢个男仔身形瘦削，笑容可掬，戴上眼镜感觉上似係一个醒目仔。
佢带咗我去一间玻璃房，门口名牌写住「General Manager – Operations」。
「早晨啊Summer！请坐吖！今日你第一日on board，我哋lunch time会一齐食，俾你认识下啲teammate。」Mandy係公司嘅GM，亦係直接管理我呢条team。
虽然面试嘅时候喺zoom已经同呢位直属阿姐见过面，但始终面试见面同真正返工认识嘅感觉係两回事。
Mandy係一个短头髮、身材高佻嘅女人，望落去应该40岁中至尾左右，讲嘢快、直接，似係一个豪爽嘅人。
通常返工第一日都冇咩嘢做，set up下啲accounts咁又过咗半日。
到咗食饭时间，Chris带我先去餐厅坐低，等埋其他同事。
隔咗一阵，Mandy同另一个男同事终于都到。
「我係Matt，今朝出咗去做嘢，啱啱先返到」呢一位就係我条team嘅assistant manager，而我同Chris就一样都係senior officer。
虽然大家职级有别，但一样都係由GM直接管理，即係大家都係平起平坐，冇从属之分。
Matt身形比较健硕、皮肤黝黑，虽然带眼镜但感觉比较运动型，有啲阳光气息。
食饭期间都係大家闲话家常，了解下公司运作。
呢间公司set up咗唔够十年，同事们都唔係做咗好耐，连Mandy呢类管理层都只係做咗两三年。
出嚟打工打得耐就会知，通常新成立又规模细嘅公司宁舍多奇怪事，仲要咁多新同事，睇嚟真係要自求多福。

二、接触
喺我继续讲落去之前，等我介绍下公司係做咩先。
我公司係政府法定机构，负责监管住社会上某一种行业，处理投诉、违规个案、举办业界相关嘅活动。
而我就负责公司嘅公关工作，具体讲就係宣传、教育、出版等嘅工作。
因为公司係新成立嘅关係，好想多啲曝光率，等市民大众熟悉公司品牌形象，所以返工头一星期都已经好多嘢要我着手跟进。
虽然全个公关部门有我、Chris同Matt三个同事，但係我同Matt合作会比较多，而Chris因为主要处理影片、相片嘅工作，所以就比较独立。
有一日，我喺上昼处理完自己手上嘅工作，就坐返自己位跟进埋啲手尾。
「你知唔知阿姐喺8楼发癫啊？」有两个同事喺附近窃窃私语，佢哋口中嘅阿姐就係Mandy。
Mandy虽然个人好豪爽，但同时情绪大起大落，好容易就发嬲西面。
我打听到原来係Matt喺写字楼8楼会场準备紧下午搞业界活动，但係时间紧迫，又唔够人手，阿姐大发雷霆。
既然Chris出咗去做嘢，成条team得我一个可以帮手，于是我本住捱义气嘅精神即刻冲咗落8楼，去到场地同大家一齐排櫈贴名牌、砌backdrop移檯，最后赶得切喺活动前完成。
「唔该晒！」可能係Matt冇预过我会落嚟帮手嘅关係，佢见到我嘅时候神情有啲惊喜，喺讲「唔该」嘅时候仲搣咗我手臂一下。
我有啲愕然，心谂唔该咪唔该，做乜鸠要搣我？
不过我谂可能呢位同事係比较有趣，所以冇摆喺心上。
自从嗰次开始，Matt就经常有意无意咁搣我手臂我试过喺写字楼大堂等?
返公司嗰阵撞到佢俾佢搣、试过喺公司pantry撞到佢俾佢搣，又或者同事之间讲笑讲到兴起佢都会搣我。
虽然就唔痛，但当次数变得愈来愈多嘅时候我就会谂，呢条友搣我嘅用意喺边呢？
唔单止咁，我仲发现到其他异常嘅情况。
平时我哋都会3个人食饭，或者Matt带饭、我哋再搵其他同事一齐食，但渐渐Matt愈来愈多同我哋食饭，甚至喺Chris出去做嘢嘅日子，佢都会选择同我单独食饭。
可能你会谂，同事间食餐饭啫，会唔会係你自己谂多咗咋？
我起初都冇为意，所以继续同佢相处，继续俾佢搣手臂，然后……

三、人肉闹钟
我被吩咐喺一个星期六嘅上昼，要去到理工大学陪同主席出席活动。
Matt知道之后，主动以「需要帮主席影相」，加上「Summer新嚟」嘅理由话要傍住我一齐去。
「听朝好早喎……我都唔知起唔起到身。」我喺Chris个位同佢吹紧水嘅时候，身后嘅Matt突然间咁讲。
「八点起身差唔多啦，都唔算好早啫。」我拧转头向打紧喊露嘅Matt讲。
「咁你叫我起身喇。」Matt漫不经心地讲咗句。
究竟佢係戏言，纯粹想开下玩笑，定係认真想我叫佢起身呢？我依然都係睇唔穿。
「听日做完嘢食饭？」夜晚我收到佢嘅message。
「冇所谓啊。」听日活动完咗都够钟食晏，一齐食都好啊。
「你搵下想食咩？」睇嚟佢想我认真搵间餐厅，再加埋今日佢叫我 morning call，案情应该冇咁单纯。
虽然Matt外形係几吸引，但係我啱啱先入嚟公司，加上自己唔係单身，睇嚟都係唔适宜轻举妄动。
「嘟嘟……嘟嘟……」星期六嘅朝早，我最后都打咗俾佢，因为我怕佢迟到最后会连累我一齐俾人闹。
「喂……」电话另一边传来係Matt懒洋洋嘅声线。
「喂？起身喇，唔好迟到啊。」自己身为AM，明知要出活动都唔较闹钟起身，我都冇佢咁好气，叫完佢起身就收线，换衫出门口。
「食唔食早餐？」搭紧车嘅时候又收到Matt嘅短讯。
「我去红磡M记，赶得切就join啦。」
「你咁快嘅？」Matt拎住个早餐坐咗喺我隔篱。
今日佢冇戴眼镜，转咗戴con，睇落比起平时冇咁不修边幅，醒神好多。
「废事迟到啦，一阵仲要行过去。」我食嘢唔算快，加上係第一次陪主席出活动，所以预多咗时间。
「咁叻，起到身叫我仲早咗出门口。」Matt边食边讲。
我哋去到理工，发现原来仲有另一位经理在场等候主席。
整个活动其实就係陪主席同其他嘉宾交流合照，照顾主席所需。
Matt同我被安排坐喺场地中间，喺唔需要出动嘅时间我哋都係细细声倾偈解闷，废事恰眼瞓被主席见到咁样衰。
坐咗三个钟，终于都完场。
「喂，係咪去食你搵嗰间日本餐厅？」我哋执返好啲私人物品準备离开，Matt问我。
「好啊，我去洗手间先。」
正当我去完洗手间出嚟，就见到Matt同紧嗰位经理喺度倾偈。
「一齐食饭吖，Summer你ok啊可？」Matt问。
虽然本来係预咗净係我同佢食，不过有多一个同事都冇所谓嘅。
「哦……好啊。」我连忙点头。
我哋一行三人最后去咗饮茶，冇去到我原先向Matt提议嘅餐厅。
食完饭Matt话要返公司放低部电脑，经理约咗人，而我返屋企，大家分道扬镳。
「估唔到最后係去咗饮茶。」搭车期间收到Matt嘅短讯。
其实我冇咩所谓，而且经理叫到，冇理由唔一齐食嘅。
「唔紧要啦，经理喺度嘛。」
「有机会去食返。」佢覆返我。
呢句类似「得闲饮茶」嘅回应，究竟係客套说话定係认真邀约？
「好啊。」

四、初约
我之前提过我唔係单身。
冇错，我29岁结婚，而家结咗婚三年左右。
老公係我嘅大学同学，大家一齐咗好耐，你可以用「老夫老妻」嚟形容我哋，但夫妻间应该有嘅甜蜜同激情都仲存在。
不过因为我老公係需要轮更工作，而我就返星期一至五朝九晚六，一星期可能只有一两日係有一整日相处，其他日子就係我返工时佢收工，或者我收工时佢返工嘅状态。
结婚咁耐我都冇尝试过出轨，一来係懒，二来係我冇遇到对佢有兴趣嘅人。
如果真係遇到，我都想试下偷食其实係点。
讲返Matt，喺嗰次活动之后佢同我短讯来往得愈来愈频密，除咗正常讲公事，就连返工打牙骹、收工放假都可能会倾偈吹水，有时讲下阿姐坏话，有时讲下边间餐厅好食、连登有咩睇咁。
「食唔食返上次间餐厅？」佢突然间提返起，我以为佢当日只係讲下就算。
「好啊，叫埋Chris？」话晒三个人一条team，收工食饭联谊下好似开心啲。
「上次我净係约你，都冇约佢。」佢咁坚持净係想两个人食，我冇理由唔成全佢架？
喺约好嘅当晚，Matt喺临近收工时间先离开公司，叫我去到地铁站再会合返佢，以免其他同事见到会误会，最重要係唔想Chris见到。
晚饭期间一切互动都好正常，除咗倾下以前做公关嘅趣事，大家仲分享下日常生活有咩嗜好。
一路倾一路发现原来我哋都有啲共通点，例如大家都有去过古巴、有一齐参与过「光复屯门市镇公园」。
当呢啲细节开始日积月累，慢慢令我对佢改观，眼前呢个人唔止同我投契，就连喜好都有啲相似，我甚至喺度谂：如果我呢一刻係单身，会唔会已经锺意咗佢？
食完饭我哋由黄埔行到去红磡站，边行边讲，整个对话冇一刻中断过。
「返到屋企未？」Matt开始关心埋我係咪平安返到。

五、心动
「你出咗门口未？」今朝我喺大围等紧东铁返工，突然收到Matt嘅短讯。
「等紧车，做咩？」唔通係有突发公事要我帮手，想我快啲返公司？
「喂！」有人拍咗一拍我膊头，原来係Matt。
「早晨啊……」我吓咗一跳，佢唔係住上水架咩？
「一齐搭车吖！」佢若无其事咁示意我一齐排队等车。
我点会唔知Matt係特登早到嚟等我，但既然佢唔解释，我都冇需要揭穿佢。
返工日子嘅东铁有几逼、有几多人，相信都唔需要我形容。
Matt为咗想我哋两个人都上到车，佢身先士卒逼开啲人，我就企咗喺车门同佢之间。
我哋两个几乎係身贴身嘅距离，佢仲要用手撑住车门，我感受到佢嘅呼吸，闻到佢身上沐浴露混和咗止汗剂嘅气味。
「会唔会好逼？」Matt喺我耳边细细声问。
「唔会……」我唔敢望住佢，呢个距离实在太令人尴尬。
突然间东铁急剎，车厢大部份人企唔稳向前倾，我都失去平衡而一时情急捉住咗Matt。
喺我企返好嘅时候，我发现原来佢将我拉向自己，一只手已经喺我腰间，我差少少就成个人哄埋咗佢心口。
「Sorry……唔係有心……你ok嘛？」Matt即刻缩手，似係紧张我会反感。
「冇事……」我继续迴避佢目光，希望佢唔会发现我块面已经红晒。
我哋前后脚返到公司，废事俾同事发现我哋有咩异样。
「喂Summer，阿姐话本书呢个星期先交到俾vendor印喎。」我抬头一望，又係Matt。佢如常地同我交代公事，好似今朝咩事都冇发生过咁。
「咁赶？未必得喎……」我负责出版公司嘅年度报告，而家只係去到校对嘅阶段，突然间阿姐下令要加快进度，搞到我有啲措手不及。
「睇得几多得几多啦，你对唔切嘅话我帮你睇啲。」Matt以往都有帮手跟进过年度报告嘅出版同印刷，由我上任以来亦都係佢一直从旁指导。
佢见我一脸苦恼，于是提出帮我手一齐做校对。
「你睇成点啊？」唔经唔觉已经去到夜晚八点，office得返我同Matt。
我今日用咗大半日嚟对稿，先至完成咗三四成，双眼睇得太耐文字仲有少少失焦。
Matt行过嚟同我交代佢嘅进度，顺道关心下我嘅精神状况。
「仲有一半啊……点算啊……」有咩可能喺今个星期搞掂拎去印？我仲要帮手搞下星期个活动……
谂到呢度我真係想直接喺公司瞓觉算喇。
「唔好谂喇，我哋收工食饭先啦。」Matt见我颓废到趴咗喺檯面，轻轻拍一拍我头，示意我要收工休息。
我哋去咗公司附近嘅餐厅医肚，再一齐搭地铁。
「係咪好攰？」我一坐低已经合埋眼休息，甚至冇气力回应Matt嘅关心。
然后我感觉到有人轻轻力将我个头推向佢嘅方向，想我挨落去。
「借个膊头俾你喇。」我真係好攰，彷彿有啲头晕眼花，需要静静地瞓一觉。
个膊头借得俾我好合时，我呢刻真係好需要一个倚靠。